குழந்தையின் முதல் உணவு என்பது வெறும் பசியைப் போக்கும் உணவு மட்டுமல்ல; அது ஆயுள் முழுமைக்கும் தேவையான நோயெதிர்ப்புச் சக்தியையும் ஆரோக்கியத்தையும் வழங்கும் ஒரு புனிதமான அமிழ்தம். "தாய்ப்பால்" என்பது இயற்கையினால் தாய்க்கும் சேய்க்கும் அளிக்கப்பட்ட ஆகச்சிறந்த கொடையாகும்.

தாய்ப்பால் கொடுப்பதன் அவசியத்தை உணர்த்தவும், அது குறித்த விழிப்புணர்வை உலகளவில் ஏற்படுத்தவும் ஆண்டுதோறும் உலக தாய்ப்பால் வாரம் (World Breastfeeding Week) மிகக் கோலாகலமாகக் கொண்டாடப்பட்டு வருகிறது.

உலக தாய்ப்பால் வாரம் - வரலாற்றுப் பின்னணியும் நோக்கமும்

தாய்ப்பால் கொடுப்பதன் முக்கியத்துவத்தை உலக நாடுகளுக்கு உணர்த்தவும், தாய்ப்பால் கொடுக்கும் தாயார்களுக்குத் தேவையான ஆதரவை சமூக அளவில் உருவாக்கவும் இந்நாள் கொண்டாடப்படுகிறது.

கொண்டாட்டத்தின் பின்னணி

• இன்னொசென்டி பிரகடனம் (Innocenti Declaration): 1990-ஆம் ஆண்டு ஆகஸ்ட் மாதத்தில், உலக சுகாதார நிறுவனம் (WHO) மற்றும் யுனிசெஃப் (UNICEF) ஆகிய அமைப்புகள் இணைந்து தாய்ப்பால் புகட்டுதலைப் பாதுகாக்கவும், ஊக்குவிக்கவும் ஒரு வரலாற்றுச் சிறப்புமிக்க பிரகடனத்தை உருவாக்கின.
• WABA உருவாக்கம் (1991): 1991-ஆம் ஆண்டு 'தாய்ப்பால் புகட்டுதலுக்கான உலகளாவிய கூட்டமைப்பு' (WABA - World Alliance for Breastfeeding Action) உருவாக்கப்பட்டது.
• முதல் கொண்டாட்டம் (1992): 1992-ஆம் ஆண்டிலிருந்து உலக தாய்ப்பால் வாரம் முறைப்படி கொண்டாடப்பட்டு வருகிறது. இன்று உலகெங்கிலும் 120-க்கும் மேற்பட்ட நாடுகளில் இந்நாள் கடைப்பிடிக்கப்படுகிறது.

எப்போது கொண்டாடப்படுகிறது?

ஆண்டுதோறும் ஆகஸ்ட் 1 முதல் ஆகஸ்ட் 7 வரை உலக தாய்ப்பால் வாரமாக அனுசரிக்கப்படுகிறது. (சில நாடுகளில் அக்டோபர் மாதத்திலும் இது கொண்டாடப்படுவதுண்டு).

முதன்மை நோக்கங்கள்

• விழிப்புணர்வு ஏற்படுத்துதல்: சீம்பால் (Colostrum) முதல் ஆறு மாத கால முழுமையான தாய்ப்பாலின் முக்கியத்துவத்தைப் தாய்மார்களுக்கும் குடும்பங்களுக்கும் உணர்த்துதல்.
• சமூக மற்றும் வேலைவாய்ப்பு ஆதரவு: பணிக்குச் செல்லும் தாய்மார்கள் சிரமமின்றி தாய்ப்பால் புகட்ட ஏதுவான சூழலை (Maternity Leave & Creche facilities) உருவாக்க அரசை வலியுறுத்துதல்.
• தவறான தகவல்களைத் தடுத்தல்: தாய்ப்பாலுக்கு மாற்றாக விற்கப்படும் செயற்கைப் பால் பவுடர்கள் (Formula Milk) குறித்த தவறான விளம்பரங்களைத் தடுத்தல்.

சீம்பால் (Colostrum) - குழந்தையின் முதல் தடுப்பூசி

பிரசவித்தவுடன் முதல் 2 முதல் 4 நாட்களில் தாயின் மார்பகத்திலிருந்து சுரக்கும் அடர்ந்த மஞ்சள் நிறப் திரவமே சீம்பால் (Colostrum) எனப்படும்

ஏன் சீம்பால் முக்கியம்? சீம்பாலில் வைட்டமின் ஏ, புரதம் மற்றும் உடலுக்குத் தேவையான நோயெதிர்ப்புப் புரதங்கள் (Immunoglobulins - குறிப்பாக IgA) மிக அதிகளவில் நிறைந்துள்ளன. இது குழந்தையின் குடலில் ஒரு பாதுகாப்புக் கவசத்தை ஏற்படுத்தி, பாக்டீரியா மற்றும் வைரஸ் தொற்றுகளிலிருந்து குழந்தையைப் பாதுகாக்கிறது. எனவே இது "குழந்தையின் முதல் இயற்கைத் தடுப்பூசி" என்று அழைக்கப்படுகிறது.

தாய்ப்பாலின் ஊட்டச்சத்து கட்டமைப்பு

தாய்ப்பாலில் குழந்தைக்குத் தேவையான அனைத்து ஊட்டச்சத்துக்களும் சரியான விகிதத்தில் கலந்துள்ளன:

• தண்ணீர் (Water): குழந்தைக்குத் தேவையான நீர்ச்சத்தை முழுமையாக வழங்குகிறது. முதல் 6 மாதத்திற்குத் தனியாகத் தண்ணீர் கொடுக்கத் தேவையில்லை.
• புரதம் (Proteins): 'வே' (Whey) மற்றும் 'கேசின்' (Casein) புரதங்கள் இலகுவாகச் செரிமானமாகி, மூளை மற்றும் தசை வளர்ச்சிக்கு உதவுகின்றன.
• கொழுப்புச்சத்து (Healthy Fats): குழந்தையின் மூளை வளர்ச்சிக்கு மிக முக்கியமானது (DHA). குழந்தையின் உடல் எடையை உயர்த்த உதவுகிறது.
• கார்போஹைட்ரேட் (Lactose): குழந்தையின் குடலில் நல்ல பாக்டீரியாக்கள் வளரவும், ஆற்றல் கிடைக்கவும் உதவுகிறது.
• வைட்டமின்கள் & தாதுக்கள்: வைட்டமின் ஏ, சி மற்றும் கால்சியம், இரும்புச்சத்து போன்றவை எளிதில் உறிஞ்சப்படும் வடிவில் உள்ளன.

குழந்தைக்குத் தாய்ப்பால் அளிக்கும் ஒப்பற்ற நன்மைகள்

தாய்ப்பால் குடிக்கும் குழந்தைகள் உடலளவிலும் மனதளவிலும் ஆரோக்கியமாக வளர்கிறார்கள் என்பதைப் பல அறிவியல் ஆய்வுகள் உறுதிப்படுத்தியுள்ளன.

நோய் எதிர்ப்புச் சக்தி

தாய்ப்பாலில் உள்ள ஆன்டிபாடிகள் (Antibodies) குழந்தைக்கு ஏற்படும் நியூமோனியா, வயிற்றுப்போக்கு, காதுத் தொற்றுகள் மற்றும் ஆஸ்துமா போன்ற நோய்கள் வராமல் தடுக்கின்றன.

எளிதான செரிமானம்

தாய்ப்பால் குழந்தையின் வயிற்றுக்கு மிகவும் உகந்தது. இது மலச்சிக்கல் அல்லது வயிற்றுப் பொருமலை ஏற்படுத்தாது.

நீண்டகால ஆரோக்கியப் பலன்கள்

தாய்ப்பால் குடித்து வளரும் குழந்தைகளுக்கு எதிர்காலத்தில் உடல் பருமன் (Obesity), டைப்-1 சர்க்கரை நோய், மற்றும் ரத்தப் புற்றுநோய் (Leukemia) வருவதற்கான வாய்ப்புகள் மிக மிகக் குறைவு.

மூளை வளர்ச்சி (IQ Level)

தாய்ப்பாலில் உள்ள கொழுப்பு அமிலங்கள் (DHA/ARA) மூளை நரம்புகளின் வளர்ச்சிக்கு உதவுகின்றன. தாய்ப்பால் அருந்திய குழந்தைகளுக்கு IQ திறன் அதிகமாக இருப்பதாகக் கண்டறியப்பட்டுள்ளது.

தாய்க்கு ஏற்படும் மருத்துவ நன்மைகள்

தாய்ப்பால் கொடுப்பது குழந்தைக்கு மட்டுமன்றி, தாயின் ஆரோக்கியத்திற்கும் மிக அத்தியாவசியமானது:

• விரைவான உடல் நலம் பெறல்: பிரசவத்திற்குப் பின் தாய்ப்பால் கொடுக்கும் போது 'ஆக்ஸிடோசின்' (Oxytocin) என்ற ஹார்மோன் சுரந்து, கருப்பை விரைவாக இயல்பு நிலைக்குத் திரும்ப உதவுகிறது; பிரசவத்திற்குப் பிந்தைய ரத்தப்போக்கைக் குறைக்கிறது.
• புற்றுநோய் ஆபத்து குறைகிறது: தாய்ப்பால் கொடுக்கும் தாய்மார்களுக்கு மார்பகப் புற்றுநோய் (Breast Cancer) மற்றும் சினைப்பை புற்றுநோய் (Ovarian Cancer) வருவதற்கான வாய்ப்பு பெருமளவு குறைகிறது.
• எடை குறைப்பு: கர்ப்ப காலத்தில் அதிகரித்த உடல் எடையை இயற்கை வழியில் குறைக்க தாய்ப்பால் புகட்டுதல் உதவுகிறது (தினமும் சுமார் 500 கலோரிகள் வரை எரிக்கப்படுகின்றன).
• மன அழுத்தம் குறைதல்: தாய் மற்றும் சேய் இடையேயான பிணைப்பை அதிகரித்து, பிரசவத்திற்குப் பிந்தைய மன அழுத்தத்தை (Postpartum Depression) போக்குகிறது.

தாய்ப்பால் புகட்டும் சரியான முறைகள் (Latching & Positioning)

தாய்ப்பால் கொடுக்கும் போது தாய்க்கும் குழந்தைகக்கும் சரியான நிலை (Position) மிகவும் முக்கியம்.

பிடிப்பு முறை (Latching)

• குழந்தையின் வாய் அகலமாகத் திறந்திருக்க வேண்டும்.
• தாயின் மார்பகக் காம்பைச் சுற்றி உள்ள கருப்பான பகுதி (Areola) குழந்தையின் வாய்க்குள் பெரும்பாலான அளவு சென்றிருக்க வேண்டும்.
• காம்பை மட்டும் குழந்தை உறிஞ்சினால் தாய்க்கு வலி ஏற்படும்; பாலும் சரியாக வராது.

நிலைகள் (Positions)

• Cradle Hold: இயல்பாக உட்கார்ந்து கைகளில் குழந்தையைத் தாங்கிப் பால் கொடுக்கும் முறை.
• Side-lying Position: படுத்துக் கொண்டே பால் கொடுக்கும் முறை (இரவு நேரங்களில் அல்லது சிசேரியன் பிரசவத்திற்குப் பின் உகந்தது).
• Football Hold: குழந்தையைப் பக்கவாட்டில் வைத்துப் பால் கொடுக்கும் முறை.

தாய்ப்பால் குறித்த மூடநம்பிக்கைகளும் உண்மைகளும்

சமூகத்தில் தாய்ப்பால் குறித்து நிலவும் சில தவறான கருத்துக்களும் அதற்கான அறிவியல் உண்மைகளும்:

மூடநம்பிக்கை: "முதல் நாளில் சுரக்கும் மஞ்சள் பால் (சீம்பால்) கெட்ட பால், அதைச் செல்லச் சுரக்கக் கூடாது."

உண்மை: சீம்பால் தான் குழந்தையின் முதல் தடுப்பூசி. அதை நிச்சயமாகக் குழந்தைக்குக் கொடுக்க வேண்டும்.

மூடநம்பிக்கை: "கோடைகாலத்தில் குழந்தைக்குத் தாகம்ெடுக்கும், எனவே பால் கொடுத்தாலும் தண்ணீர் கொடுக்க வேண்டும்.

"உண்மை: தாய்ப்பாலிலேயே 87% நீர்ச்சத்து உள்ளது. முதல் 6 மாதங்களுக்குத் தண்ணீரோ வேறு திரவங்களோ தேவையில்லை.

மூடநம்பிக்கை: "தாயின் மார்பக அளவு சிறியதாக இருந்தால் பால் சுரப்பு குறைவாக இருக்கும்.

"உண்மை: மார்பக அளவிற்கும் பால் சுரப்பிற்கும் எந்தச் சம்பந்தமும் இல்லை. குழந்தை பாலை உறிஞ்ச உறிஞ்சத் தான் 'புரோலேக்டின்' ஹார்மோன் சுரந்து பால் உற்பத்தி அதிகரிக்கும்.

பணிக்குச் செல்லும் தாய்மார்களும் சமூகத்தின் பொறுப்பும்

இன்றைய காலகட்டத்தில் பல தாய்மார்கள் பணிக்குச் செல்வதால் தாய்ப்பால் கொடுப்பதைத் தவிர்க்கும் நிலை ஏற்படுகிறது. இதை மாற்றச் சமூகம் மற்றும் நிறுவனங்கள் ஆதரவளிக்க வேண்டும்.

• தாய்ப்பால் சேமிப்பு (Expressing Breast Milk): பணிக்குச் செல்லும் தாய்மார்கள் 'ப்ரெஸ்ட் பம்ப்' (Breast Pump) மூலம் பாலைச் சேமித்து வைக்கலாம். அறை வெப்பநிலையில் 4-6 மணி நேரமும், ஃபிரிட்ஜில் 24 மணி நேரமும் தாய்ப்பால் கெடாமல் இருக்கும்.
• அலுவலக வசதிகள்: வேலை செய்யும் இடங்களில் தாய்ப்பால் எடுக்கத் தனியறை (Lactation Room) மற்றும் பாலைச் சேமிக்க ஃபிரிட்ஜ் வசதி செய்து தரப்பட வேண்டும்.
• சட்டப்பூர்வ மகப்பேறு விடுப்பு: இந்தியாவில் மகப்பேறு நலச் சட்டத்தின் படி 26 வாரங்கள் ஊதியத்துடன் கூடிய விடுப்பு வழங்கப்படுகிறது. இதை அனைத்து நிறுவனங்களும் முறையாக நடைமுறைப்படுத்த வேண்டும்.

"தாய்ப்பால் என்பது குழந்தையின் உரிமை; அதைத் தருவது தாயின் கடமை மட்டுமல்ல, சமூகத்தின் கூட்டுப் பொறுப்பு."

உலக தாய்ப்பால் வாரம் என்பது வெறும் 7 நாட்கள் கொண்டாடும் விழாவாக மட்டும் நின்றுவிடக் கூடாது. ஒவ்வொரு தாயும் தன் குழந்தைக்குக் குறைந்தபட்சம் 6 மாதங்கள் வரை முழுமையான தாய்ப்பாலையும் (Exclusive Breastfeeding), அதன்பின் 2 ஆண்டுகள் வரை சத்தான கூழ் உணவுகளோடு சேர்த்துத் தாய்ப்பாலையும் வழங்கிடச் சமூகமாக நாம் ஆதரவளிக்க வேண்டும். ஆரோக்கியமான வருங்காலச் சந்ததியை உருவாக்கத் தாய்ப்பாலின் மகத்துவத்தைப் போற்றுவோம்!

சிறப்புக் கட்டுரை

கட்டுரையாளர்:

முனைவர் ஜெ. மகேந்திரன்

மூத்த ஊடகவியலாளர் ,

நிறுவனர் - மகிழ்ச்சி பவுண்டேஷன்

883878388