மண்ணின் மணத்திலிருந்து... மக்களின் மனங்கள்வரை சைலஜா கணேசன் – ஒரு சாதனைப் பெண்ணின் வாழ்க்கைப் பயணம்

சாதனைப் பெண்மணி திருமதி சைலஜா கணேசன் அவர்களிடம் நேர்காணலின் பேசியபோது அவர்களை உதிர்த்த வார்த்தைகள் எழுத்துக்களாக ...

அறிமுகம்

ஒவ்வொரு மனிதரின் வாழ்க்கையும் ஒரு பயணம். ஆனால் சிலரின் வாழ்க்கைப் பயணம், அவர்களுக்காக மட்டுமல்லாமல் பலரின் வாழ்க்கைக்கும் ஒளிவிளக்காக மாறுகிறது. சாதனைகள் என்பது ஒரே நாளில் உருவாகும் வரலாறு அல்ல. சிறு சிறு அனுபவங்கள், போராட்டங்கள், தன்னம்பிக்கை, மனிதநேயம், விடாமுயற்சி ஆகியவற்றின் சங்கமமே ஒரு சாதனை வாழ்க்கையை உருவாக்குகிறது.

அந்தப் பயணத்தின் தொடக்கம் தூத்துக்குடி மாவட்டத்தில் அமைந்துள்ள அழகிய கிராமமான கீழப்பூவாணி. அந்த மண்ணில்தான் நான் பிறந்தேன். இயற்கையோடும், மனிதநேயத்தோடும், உறவுகளின் அரவணைப்போடும் வளர்ந்த என் குழந்தைப் பருவம் இன்று வரை என் வாழ்க்கையின் மிகப்பெரிய பலமாக இருக்கிறது.

என் தந்தை திரு. கணேசன், என் தாய் திருமதி. அஞ்சலி. அவர்களுக்கு பிறந்த மூத்த மகள் நான். பெற்றோரின் அன்பும், ஒழுக்கமும், உழைப்பும், மனிதநேயமும் என் வாழ்க்கையின் முதல் பாடங்களாக அமைந்தன. இன்று நான் அடைந்திருக்கும் ஒவ்வொரு முன்னேற்றத்திற்கும் பின்னால் அவர்களின் தியாகமும், வழிகாட்டுதலும், ஆசீர்வாதமும் அமைதியாக நிற்கின்றன.

என் குடும்பம் .. என் பலம்

ஒரு பெண்ணின் வாழ்க்கையில் குடும்பம் என்பது ஒரு உறவு மட்டுமல்ல; அது அவளுடைய மிகப்பெரிய பலம். என் வாழ்க்கையிலும் அந்த பலமாக இருப்பவர்கள் என் இரண்டு குழந்தைகள்.

எனக்கு இரண்டு குழந்தைகள். என் முதல் மகள் தேவதானலட்சுமி. அவர் கலசலிங்கம் பல்கலைக்கழகத்தில் தடயவியல் (Forensic Science) இறுதியாண்டு படித்து வருகிறார். அறிவையும், ஒழுக்கத்தையும், பொறுப்புணர்வையும் சமமாக வளர்த்துக் கொண்டிருக்கும் அவரைப் பார்க்கும் ஒவ்வொரு தருணமும் எனக்கு பெருமையாக இருக்கிறது.

என் இரண்டாவது குழந்தை என் மகன் பத்ரிநாத். அவர் எஸ்.ஆர்.எம். கல்லூரியில் ரீஜெனரேட்டிவ் மெடிசின் (Regenerative Medicine) முதலாம் ஆண்டு படித்து வருகிறார். உயர்ந்த இலக்குகளோடும், புதிய கனவுகளோடும் தனது கல்விப் பயணத்தை முன்னெடுத்து வருகிறார்.

என் வாழ்க்கையில் நான் பெற்ற மிகப்பெரிய செல்வம் பணமோ, பதவியோ அல்ல. என் இரண்டு குழந்தைகள்தான் என் வாழ்க்கையின் இரண்டு கண்கள், இரண்டு தோள்கள், இரண்டு தூண்கள். அவர்கள் சிரிக்கும் போது என் உலகமே மலர்கிறது; அவர்கள் முன்னேறும்போது என் வாழ்க்கையே வெற்றி பெற்றதாக உணர்கிறேன்.

ஒரு தாயாக அவர்களை வளர்த்தது என் கடமை மட்டுமல்ல; அது எனக்கு இறைவன் கொடுத்த மிகப்பெரிய வரமும், அரிய பொறுப்பும் ஆகும். என் வாழ்வின் ஒவ்வொரு வெற்றிக்கும் பின்னால் அவர்கள் அளிக்கும் அன்பும், புரிதலும், ஊக்கமும் அமைதியாக நிற்கின்றன.

என்னை வடிவமைத்த கல்வி

ஒரு மனிதனின் வாழ்க்கையை மாற்றும் மிகப்பெரிய சக்தி கல்வி. அது வெறும் எழுத்தறிவை மட்டும் வழங்குவதில்லை; மனிதனின் சிந்தனையையும், பண்பையும், வாழ்க்கை நோக்கையும் வடிவமைக்கிறது. என் வாழ்க்கையிலும் அந்த மகத்தான மாற்றத்தை ஏற்படுத்தியது கல்விதான்.

நான் பிறந்து வளர்ந்தது தூத்துக்குடி மாவட்டத்தில் அமைந்துள்ள அழகிய கிராமமான கீழப்பூவாணி. என் கல்வி சிறப்பாக அமைய வேண்டும் என்ற உயர்ந்த எண்ணத்தில், என் தந்தை சிங்கத்தாக்குறிச்சியில் உள்ள வங்கியில் பணியாற்றி வந்தபோதிலும், என் படிப்பிற்காக எங்கள் குடும்பத்தை வல்லநாடுற்கு

அழைத்து வந்தார். ஒரு பெற்றோர் தன் குழந்தையின் எதிர்காலத்திற்காக எடுக்கும் முடிவுகளில் மிக உயர்ந்தது கல்விக்காக செய்யும் தியாகம். அந்தத் தியாகத்தின் பலன்தான் என் கல்விப் பயணத்தின் வலுவான அடித்தளமாக அமைந்தது.

என் கல்வியின் முதல் அடியை வல்லநாடுடில் உள்ள பாரதி நர்சரி பள்ளியில் வைத்தேன். அங்கேதான் எழுத்துக்களை முதன்முதலாக அறிந்தேன்; ஆசிரியர்களின் அன்பையும், பள்ளி வாழ்க்கையின் இனிமையையும் உணர்ந்தேன். அந்தச் சிறிய வகுப்பறையில் தொடங்கிய பயணம், பின்னாளில் என் வாழ்க்கையின் மிகப் பெரிய கனவுகளுக்கு வழிகாட்டியது.

அதன்பிறகு என் பள்ளிக் கல்வி முழுவதும் ஸ்ரீ சாரதா மெட்ரிகுலேஷன் மேல்நிலைப்பள்ளியில் தொடர்ந்தது. அந்தப் பள்ளி எனக்கு கல்வி கற்றுத் தந்த இடம் மட்டுமல்ல; வாழ்க்கையை வாழக் கற்றுத் தந்த புனிதமான ஆலயமாக இருந்தது. அங்கே பாடங்களை மனப்பாடம் செய்வதை விட, மனிதநேயத்தை மனதில் பதியச் செய்தார்கள்.

ஸ்ரீ ராமகிருஷ்ண பரமஹம்சர், அன்னை ஸ்ரீ சாரதா தேவி, சுவாமி விவேகானந்தர் ஆகிய மகான்களின் வாழ்க்கை வரலாறுகளும், அவர்களின் உயர்ந்த சிந்தனைகளும் என் மனதில் ஆழமான தாக்கத்தை ஏற்படுத்தின. ஒழுக்கம், பணிவு, கட்டுப்பாடு, ஆன்மீகம், மனிதநேயம், சமூகப் பொறுப்பு ஆகிய உயர்ந்த பண்புகள் அங்கேயே என்னுள் விதைக்கப்பட்டன.

அந்தப் பள்ளி எனக்குக் கற்றுக் கொடுத்த மிகப் பெரிய உண்மை என்னவென்றால், கல்வி என்பது ஒரு வாழ்க்கையின் ஒரு பகுதி மட்டுமே; ஆனால் வாழ்க்கையை அர்த்தமுள்ளதாக்கும் அடித்தளம் அதுவே. புத்தகங்களில் கிடைக்கும் அறிவு ஒரு மனிதனை பட்டதாரியாக மாற்றலாம்; ஆனால் பண்பும், பரிவும், பொறுப்புணர்வும் சேர்ந்த கல்விதான் ஒரு மனிதனை முழுமையான மனிதனாக உருவாக்கும்.

பள்ளிக் கல்வியை நிறைவு செய்த பிறகு வணிகவியலில் இளங்கலை (B.Com.) பட்டப்படிப்பை முடித்தேன். அதன்பிறகு திருமணம், குடும்பப் பொறுப்புகள் என வாழ்க்கை புதிய பாதையில் பயணித்தாலும், கல்வி மீது கொண்டிருந்த ஆர்வம் ஒருபோதும் குறையவில்லை. குடும்ப வாழ்க்கையையும், கல்வியையும் சமநிலைப்படுத்தி முதுகலை வணிகவியல் (M.Com.) பட்டத்தையும் வெற்றிகரமாக நிறைவு செய்தேன்.

இன்று நான் வாழ்க்கையில் எந்த உயரத்தில் நின்றிருந்தாலும், அதன் வேர்களில் என் பெற்றோரின் தியாகமும், என் ஆசிரியர்களின் அர்ப்பணிப்பும், என்னை வடிவமைத்த கல்வியின் ஒளியும் உறுதியாக நிற்கின்றன. என் வாழ்க்கையில் நான் பெற்ற மிகப்பெரிய சொத்துகளில் ஒன்று கல்வி; நான் இன்று யாராக இருக்கிறேனோ, அதற்கு அடித்தளம் அமைத்தது இந்தக் கல்வியே.

பணியே என் அடையாளம்

தொழில்முனைவோர் என்ற அடையாளத்துடன் தேவா இன்ஜினியரிங் வொர்க்ஸ் நிறுவனத்தை நிர்வகித்து வருகிறேன். மேலும், எஸ்.ஜி.ஆர். ஸ்ட்ராடோஸ் நிறுவனத்தின் நிறுவனர் மற்றும் நிர்வாக இயக்குநராக செயல்பட்டு வருகிறேன்.

சாய் தேவ் அறக்கட்டளையின் நிறுவனர் மற்றும் தலைவராக சமூக நலப் பணிகளை முன்னெடுத்து வருகிறேன்.

யாழினி மகளிர் சுய உதவிக்குழுவின் தலைவராகவும், பகுதி அளவிலான மகளிர் கூட்டமைப்பின் பிரதிநிதியாகவும் செயல்பட்டு வருகிறேன்.

ஃபோகஸ் ஸ்போர்ட்ஸ் ஆஃப் இந்தியா அமைப்பின் தலைவராகவும், தமிழ்நாடு கிராமிய விளையாட்டு அமைப்பின் தூத்துக்குடி மாவட்டத் தலைவராகவும் பொறுப்பு வகித்து வருகிறேன்.

கோவில்பட்டி டெம்பிள் சிட்டி லயன்ஸ் கிளப் அமைப்பில் இரண்டு ஆண்டுகள் பொருளாளராகவும், ஆறு ஆண்டுகள் செயலாளராகவும், தலைவராகவும், மண்டலத் தலைவராகவும் பணியாற்றியுள்ளேன்.

ஊடகத் துறையில் ரிப்போர்டர் பவர் இதழில் மாநில சிறப்புச் செய்தியாளராக, மக்கள் வெளிச்சம் நாளிதழில் செய்தியாளராகவும், ஆல் மீடியா பிரஸ் யூனியனின் மாநில ஆலோசகராகவும் பொறுப்பு வகித்து வருகிறேன்.

மேலும், மகிழ்ச்சி எஃப்.எம். இணையதளத்தில் சமூக அக்கறை மற்றும் விழிப்புணர்வு சார்ந்த எழுத்தாளராக தொடர்ந்து பங்களித்து வருகிறேன்.

பல கல்வி நிறுவனங்களில் சிறப்பு விருந்தினர் பேச்சாளராக கலந்து கொண்டு, மாணவர்களுக்கு தன்னம்பிக்கை, சமூகப் பொறுப்பு மற்றும் வாழ்க்கைத் திறன்கள் குறித்து விழிப்புணர்வு உரைகளை வழங்கி வருகிறேன்.

அதோடு, நூலாசிரியராகவும் தொடர்ந்து எழுதி வருகிறேன்.

மக்களோடு என் பாதை

சமூகத்தின் மீது கொண்ட அக்கறையும், மனிதநேயத்தின் மீதான நம்பிக்கையும் என்னை பல்வேறு பொதுநலப் பணிகளில் தொடர்ந்து ஈடுபட வைத்துள்ளன. சேவை என்பது என் வாழ்க்கைப் பயணத்தின் பிரிக்க முடியாத ஒரு பகுதியாக மாறியுள்ளது.

அரசுப் பள்ளிகளில் கல்வியில் சிறந்து விளங்கும் மாணவ, மாணவிகளை ஊக்குவிக்கும் வகையில் பரிசுகள் மற்றும் பாராட்டுகளை வழங்கி வருகிறோம். பொருளாதாரத்தில் பின்தங்கிய மாணவர்களுக்கு ஆண்டுதோறும் புத்தகங்கள், நோட்டுப் புத்தகங்கள் மற்றும் கல்வி உபகரணங்களை வழங்கி அவர்களின் கல்விப் பயணத்திற்கு உறுதுணையாக இருந்து வருகிறோம்.

சமூகத்தில் பல்வேறு துறைகளில் சாதனை படைக்கும் பெண்களை கௌரவித்து, அவர்களின் சாதனைகளை வெளிக்கொண்டு வந்து, மேலும் பல பெண்களுக்கு ஊக்கமளிக்கும் நிகழ்ச்சிகளை தொடர்ந்து நடத்தி வருகிறோம்.

மாநில மற்றும் தேசிய அளவிலான விளையாட்டுப் போட்டிகளில் வெற்றி பெறும் வீரர், வீராங்கனைகளை பாராட்டி, விருதுகள் வழங்கி கௌரவித்து வருகிறோம்.

காவல்துறை மற்றும் மருத்துவத் துறைகளில் சிறப்பாகப் பணியாற்றுபவர்களை கௌரவித்து, அவர்களின் அர்ப்பணிப்பு மிக்க சேவையை பாராட்டி வருகிறோம்.

சர்க்கரை நோய் விழிப்புணர்வு, கல்வி விழிப்புணர்வு, மஞ்சள் பை பயன்பாடு, சுற்றுச்சூழல் பாதுகாப்பு உள்ளிட்ட பல்வேறு விழிப்புணர்வு நிகழ்ச்சிகளை நடத்தி, பொதுமக்களிடையே சமூகப் பொறுப்புணர்வை ஏற்படுத்தி வருகிறோம்.

ஆதரவற்ற மற்றும் அடையாளம் தெரியாதவர்களின் உடல்களுக்கு மனிதநேயத்துடன் இறுதி மரியாதை செலுத்தி நல்லடக்கம் செய்யும் சேவையையும் தொடர்ந்து செய்து வருகிறோம்.

பொருளாதாரத்தில் பின்தங்கிய பெண்களுக்கு தையல் இயந்திரங்களை வழங்கி, அவர்கள் தன்னம்பிக்கையுடன் சுயதொழில் செய்து வாழ வழிவகை செய்து வருகிறோம்.

கொரோனா பெருந்தொற்று காலத்தில் பாதிக்கப்பட்ட ஏழை மற்றும் எளிய குடும்பங்களுக்கு ஒரு மாதத்திற்குத் தேவையான அரிசி, மளிகைப் பொருட்கள் மற்றும் அத்தியாவசியப் பொருட்களை வழங்கி அவர்களுக்கு உறுதுணையாக இருந்தோம்.

பல ஆண்டுகளாக மூடப்பட்டு வழிபாடு இல்லாமல் இருந்த பழமையான கோவில்களை மீண்டும் மக்கள் வழிபடும் நிலைக்கு கொண்டு வருவதற்கான திருப்பணிகளில் ஈடுபட்டு, கோவிலைச் சீரமைத்து, வழிபாடு மீண்டும் நடைபெறுவதற்கான பணிகளை மேற்கொண்டுள்ளோம்.

இந்தப் பயணம் முழுவதும் நான் பெற்ற மிகப்பெரிய செல்வம் மக்களின் அன்பும், நம்பிக்கையும் தான். நான் செய்யும் ஒவ்வொரு சேவையும், ஒரு மனிதனின் வாழ்க்கையில் ஒரு சிறிய மாற்றத்தை ஏற்படுத்த வேண்டும் என்ற எண்ணத்துடனேயே மேற்கொள்ளப்படுகிறது.

"நான் விட்டுச் செல்ல விரும்புவது செல்வத்தை அல்ல... மனிதநேயத்தால் நிரம்பிய ஒரு தடத்தை."

என் வளர்ச்சியின் வழிகாட்டிகள்

என் வாழ்க்கையில் நான் எடுத்த ஒவ்வொரு முன்னேற்றப் படிக்கும் பின்னால், என்னை நம்பிய சில நல்ல உள்ளங்கள் இருக்கின்றனர். அவர்களின் வழிகாட்டுதலும், ஊக்கமும், நம்பிக்கையும் தான் இன்று நான் அடைந்துள்ள ஒவ்வொரு வெற்றிக்கும் அடித்தளமாக அமைந்துள்ளது.

என் தொழில் வாழ்க்கையின் ஆரம்பக் காலத்தில் எனக்கு வழிகாட்டியாக இருந்தவர் திரு. அம்பி ஐயப்பன் அவர்கள். அவருடைய அனுபவமும், ஊக்கமும் என் தொழில் பயணத்திற்கு வலுவான அடித்தளமாக அமைந்தது.

என் வாழ்க்கையில் ஒரு புதிய பாதையை உருவாக்க வேண்டும் என்ற எண்ணத்திற்கு முதல் விதையை விதைத்தவர் திரு. யோகா சுரேஷ் அவர்கள். தொழில் எவ்வாறு முன்னேற வேண்டும் என்பதையும், என்னுள் இருந்த எழுத்துத் திறனை வெளிக்கொண்டு வந்து பத்திரிகைத் துறையில் என்னை அறிமுகப்படுத்திய பெருமையும் அவரையே சாரும்.

என் சமூகப் பயணத்தின் ஆரம்பத்தில் எனக்கு முழு ஆதரவாக இருந்தவர் தேசிய துணைத் தலைவர் திரு. தா. பாலசுப்ரமணியன் அவர்கள். தைரியமாகவும், உண்மையுடனும், நேர்மையுடனும் வாழ வேண்டும் என்ற வாழ்க்கைப் பாடங்களை அவரிடமிருந்து கற்றுக்கொண்டேன்.

கோவில்பட்டி டெம்பிள் சிட்டி லயன்ஸ் கிளப் மூலம் சமூகச் சேவையில் தொடர்ந்து செயல்படுவதற்கு உறுதுணையாக இருந்து வருபவர் முன்னாள் தலைவர் திரு. எல்.ஐ.சி. முருகேசன் அவர்கள். அதேபோல் திரு. துரைப்பாண்டியன் மற்றும் திரு .ராஜ்குமார் அவர்களும் தொடர்ந்து ஊக்கமளித்து வருகிறார்கள்.

விளையாட்டுத் துறையில் நான் பொறுப்பேற்று செயல்படுவதற்கு முழு நம்பிக்கையுடன் வாய்ப்பளித்தவர் திரு. வெங்கடேசன் அவர்கள்.

என் எழுத்துப் பயணத்திற்கு உயிர் கொடுத்தவர் மகிழ்ச்சி Fm முனைவர் ஜெ மகேந்திரன் ,மூத்த ஊடகவியலாளர் அவர்கள். என்னுள் இருந்த சிந்தனைகளை எழுத்தாக மாற்ற முடியும் என்ற நம்பிக்கையை எனக்குள் விதைத்து, இன்று நூலாசிரியராக உருவாக காரணமானவர் அவர்தான்.

என் பள்ளிப் பருவ நண்பர் திரு. கந்தசாமி அவர்கள், எனக்கு முதல் முறையாக பிரான்சிஸ் சேவியர் பொறியியல் கல்லூரியில் விருந்தினர் பேச்சாளராக பேசும் வாய்ப்பை ஏற்படுத்திக் கொடுத்தவர். அந்த ஒரு வாய்ப்பே என் மேடைப் பேச்சுப் பயணத்தின் ஆணிவேராக அமைந்தது.

என் தொழில், அறக்கட்டளை மற்றும் சமூகப் பணிகளின் அனைத்து கணக்கு மற்றும் தணிக்கைப் பணிகளிலும் எந்தவித எதிர்பார்ப்பும் இல்லாமல் பல ஆண்டுகளாக உறுதுணையாக இருந்து வருபவர் என் கல்லூரி நண்பர் திரு. பாலசுப்பிரமணியன் அவர்கள். என் வளர்ச்சிக்கும், நான் மேற்கொள்ளும் ஒவ்வொரு முயற்சிக்கும் அமைதியாக பின்னால் இருந்து உறுதுணையாக நிற்கும் அரிய நண்பர்.

என் வாழ்க்கையின் பல்வேறு தருணங்களில் ஆன்மீக வழிகாட்டுதலையும், தேவையான ஆலோசனைகளையும் வழங்கி, உடல்நலக் குறைபாடுகள் ஏற்பட்ட நேரங்களிலும் அக்கறையுடன் வழிகாட்டி உதவி செய்து வருபவர் கோவில்பட்டி அகஸ்தியர் நாடி ஜோதிட நிலையத்தைச் சேர்ந்த திரு. ஜெயசீலன் அவர்கள். அவருடைய அன்பான வழிகாட்டுதல் என் வாழ்க்கையில் மறக்க முடியாத இடத்தைப் பெற்றுள்ளது.

ஒரு ஆணின் வெற்றிக்குப் பின்னால் ஒரு பெண் இருப்பாள்" என்று கூறுவார்கள். ஆனால் இன்று நான் இந்த நிலையை அடைந்திருப்பதற்கு பின்னால், எந்தவித சுயநலமும் இல்லாமல், என் மீது நம்பிக்கை வைத்து, என்னை ஊக்குவித்து, என் வெற்றியை தங்களின் வெற்றியாகக் கருதிய பல நல்ல உள்ளங்கள் இருக்கின்றனர். அவர்கள் ஒவ்வொருவருக்கும் என் இதயப்பூர்வமான நன்றியை என்றும் உரித்தாக்கிக் கொள்கிறேன்.

என் வாழ்க்கைப் பயணத்தில் நான் தனியாக நடக்கவில்லை... என்னை நம்பிய ஒவ்வொரு மனிதரின் அன்பும், நம்பிக்கையும், ஆசீர்வாதமும் என் வெற்றியின் உண்மையான அடித்தளம்.

என் பயணத்தில் துணை நிற்பவர்கள்

என் வாழ்க்கைப் பயணத்தில் நான் எடுக்கும் ஒவ்வொரு முயற்சியிலும் என்னுடன் உறுதுணையாக நிற்கும் நல்ல உள்ளங்கள் பலர் உள்ளனர். அவர்களின் அன்பும், நம்பிக்கையும், ஊக்கமும்தான் என்னை தொடர்ந்து முன்னேறச் செய்கிறது.

என் தம்பி திரு. பாலரங்கநாதன் அவர்கள் மற்றும் அவரது வாழ்க்கைத் துணைவியார் திருமதி. தனலட்சுமி ஆகியோர் என் ஒவ்வொரு முயற்சியிலும் அன்புடனும் உறுதியுடனும் துணை நிற்கிறார்கள்.

அதேபோல், என் சித்தி திருமதி. கலாவதி அவர்களின் மகனான திரு. ராஜ் (விக்னேஸ்வரன்) அவர்களும் என் வளர்ச்சியில் தொடர்ந்து உறுதுணையாக இருந்து வருகிறார்.

ஆலம்பட்டி கிராமத்தைச் சேர்ந்த உமா அக்கா, சரோஜா, கருப்புசாமி அண்ணன், பொன்னுதுரை அண்ணன், மாரிசாமி அண்ணன், ரமேஷ் தம்பி, காளிராஜ் தம்பி, மாரிக்கண்ணன் தம்பி, மகேஷ் தம்பி, மாரிமுத்து அண்ணன் ஆகியோர் இரத்த உறவுகள் இல்லாவிட்டாலும், உறவுகளை விட மேலான அன்புடன் என் வாழ்க்கைப் பயணத்திலும் சமூகப் பணிகளிலும் எப்போதும் துணை நிற்பவர்கள்.

மேலும், கோவில்பட்டி காவல்துறையில் பணிபுரியும் எனது அன்புத் தம்பி பரமசிவம் அவர்களும் என் பயணத்தில் தொடர்ந்து உறுதுணையாக இருந்து வருகிறார்.

என் பெற்றோர்களான திரு. கணேசன் மற்றும் திருமதி. அஞ்சலி ஆகியோரின் அன்பும், ஆசீர்வாதமும் என் வாழ்க்கையின் மிகப்பெரிய பலமாகும்.

என் இரண்டு குழந்தைகளான தேவதானலட்சுமி மற்றும் பத்ரிநாத் என் வாழ்க்கையின் மிகப்பெரிய பலம். அவர்கள் தான் என் ஒவ்வொரு முயற்சிக்கும் பின்னால் இருக்கும் அமைதியான சக்தி. அவர்கள் இல்லையென்றால் இன்று நான் இல்லை என்று மனதாரச் சொல்லுவேன். என் வாழ்வின் உண்மையான உறுதுணையும், என் மிகப்பெரிய பொக்கிஷமும் அவர்களே.

என் வாழ்க்கைப் பயணத்தில் என்னை நம்பி, எந்தவித எதிர்பார்ப்பும் இல்லாமல் உறுதுணையாக நின்ற அனைவருக்கும் என் நன்றியைத் தெரிவித்துக் கொள்கிறேன்.

"உறவுகள் ரத்தத்தால் உருவாகலாம்... ஆனால் உண்மையான சொந்தங்கள் அன்பாலும், நம்பிக்கையாலும், துணைநிற்பதாலும் உருவாகிறார்கள்."

சமூகத்தில் நான் பதித்த தடங்கள்

ஒரு மனிதனின் வாழ்க்கையை உயர்த்துவது அவர் பெறும் பதவிகளோ, விருதுகளோ அல்ல; சமூகத்தில் அவர் பதிக்கும் நல்ல தடங்களே. என் வாழ்க்கைப் பயணத்தில், மக்களின் நலனுக்காக நான் மேற்கொண்ட சில முயற்சிகள் இன்று என் மனதில் மறக்க முடியாத மைல்கற்களாக நிற்கின்றன.

- கோவில்பட்டியில் அகில பாரத இந்து மகா சபா சார்பில் முதல் முறையாக விநாயகர் சதுர்த்தி ஊர்வலத்தை சிறப்பாக நடத்தினேன்.

- ஆலம்பட்டி கிராமத்தில் எட்டு ஆண்டுகளாக நீடித்து வந்த பொதுக் கிணறு பிரச்சினைக்கு அதிகாரிகளின் உதவியுடன் குறுகிய காலத்தில் தீர்வு காணச் செய்து, கிராம மக்களின் குடிநீர் பிரச்சினையை முடிவுக்குக் கொண்டு வந்தேன்.

- என் அறக்கட்டளை மூலம் பொருளாதாரத்தில் பின்தங்கிய பவித்ரா என்ற மாணவியின் செவிலியர் கல்விக்கு உதவி செய்தோம். இன்று அவர் செவிலியராக பணியாற்றி மக்களுக்கு சேவை செய்து வருவது எனக்கு பெருமையாக உள்ளது.

- கடம்பூரில் உள்ள சுமார் 300 ஆண்டுகள் பழமையான அருள்மிகு பெரு கருணீஸ்வரர் சிவன் கோயில் நீண்ட காலமாக மூடப்பட்டு மக்கள் செல்ல அச்சப்படும் நிலையில் இருந்தது. அந்தக் கோயிலில் உழவாரப் பணியைத் தொடங்கி, தொடர்ந்து வழிபாடுகள் நடைபெறவும், கோயில் மீண்டும் உயிர்ப்புடன் இயங்கவும் காரணமாக இருந்தேன்.

- ஒரு பெண்ணாக, கோவில்பட்டி பகுதியில் அடையாளம் தெரியாத மற்றும் ஆதரவற்ற மனிதர்களின் உடல்களை நேரடியாக அடக்கம் செய்யும் மனிதநேயப் பணியில் ஈடுபட்டு வருவது, என் வாழ்க்கையின் மிகத் துணிச்சலான சாதனைகளில் ஒன்றாகும். மனிதநேயம் பாலினத்தைப் பார்ப்பதில்லை என்பதை என் செயல் மூலம் உணர்த்தியிருக்கிறேன்.

- குடும்பப் பிரச்சினைகளால் பாதிக்கப்பட்ட பல பெண்களுக்கு சட்டரீதியாகவும், மனிதநேய அடிப்படையிலும் வழிகாட்டி, அவர்களின் வாழ்க்கை மீண்டும் அமைதியான பாதையில் தொடர உதவியுள்ளேன்.

- பல ஆண்டுகளாக தமிழகம் முழுவதும் பல்வேறு துறைகளில் சாதனை படைத்த பெண்களைத் தேடி கண்டறிந்து, அவர்களை கௌரவித்து, அவர்களின் சாதனைகளை சமூகத்திற்கு அறிமுகப்படுத்தி, மேலும் பல பெண்களுக்கு ஊக்கமாக இருந்து வருகிறேன்.

- பாதுகாப்பற்ற நிலையில் இருந்த ஒரு பெண்ணை உரிய காப்பகத்தில் சேர்த்து, பாதுகாப்பான வாழ்க்கை கிடைக்க உதவினேன்.

-கடம்பூர் பகுதியில் இலவச கண் பரிசோதனை முகாமை நடத்தி, 104 பேருக்கு தரமான கண் கண்ணாடிகளை வழங்கினோம்.

- கயத்தாறு பகுதியில் நடைபெற்ற கண் மருத்துவ முகாமின் மூலம் 35 பேரை இலவச கண் அறுவைச் சிகிச்சைக்காக மருத்துவமனைக்கு அனுப்பி, அவர்களுக்கு புதிய பார்வை கிடைக்க வழிவகை செய்தோம்.

இவை அனைத்தும் சாதனைகளாக நான் கருதவில்லை. மனிதர்களின் வாழ்வில் சிறிய மாற்றத்தையாவது உருவாக்க வேண்டும் என்ற எண்ணத்தில் நான் எடுத்த பயணத்தின் சில அழியாத தடங்கள் மட்டுமே.

"சாதனை என்பது உயரத்தில் நிற்பது அல்ல... மற்றவர்கள் உயர்ந்து நிற்க ஒரு படிக்கல்லாக மாறுவதுதான் உண்மையான சாதனை."

சிறப்பு நேர்காணல் கட்டுரை -

முனைவர் ஜெ மகேந்திரன் ,

மூத்த ஊடகவியலாளர்