பின்னணி இசையை முன்னுக்கு கொண்டுவந்த இளையராஜா…

0
47

மணமகளே மணமகளே வா வா..1962 ல்வெளியான சாரதா படத்தில் கவிஞர் கண்ணதாசன் உதவியாளராய் பஞ்சு அருணாசலம் எழுதிய பாடல், தமிழகத்தின் கல்யாண வீடுகளில் தவறாமல் ஒலிக்கும்.. அதேபோல சாரதாவுக்கு முன் வெளியான சிவாஜியின் பாசமலர் படத்தின் வாராய் என் தோழி வாராயோ பாடலும் திருமண நிகழ்ச்சிகளில் தவறாமல் ஒலிக்கும் தேசிய கீதம்..

அந்த வரிசையில் திருமண வீடுகளில், அரங்கங்களில், அவ்வளவு ஏன் பட்டிதொட்டியெல்லாம் பட்டையை கிளப்பிய பாடல் ‘’குத்தச்சம்பா பச்சை நெல்லை குத்ததான் வேணும்..’’ என்று ஆரம்பித்து ‘’இது நம்ம வீட்டு கல்யாணம்’’ என்று முடியும் சரணம்..

பாடலின் ஒவ்வொரு வார்த்தைக்கு பின்னாலும் இசையை கிராமிய மணத்துடன் அற்புதமாக வழங்கியிருப்பார் இசையமைப்பாளர். அவருக்கு இதுதான் முதல் படம் என்றால் நம்பவே முடியாது..

1976 அன்னக்கிளி படத்தில் இந்த மாஜிக்கை நிகழ்த்தியவர் பின்னாளில் இசைஞானி என உலகப்புகழ் எட்டிய இளையராஜா.

குத்தச்சம்பா பாடலை பின்னாளில் வெவ்வேறு வெர்ஷன்கள்ல் அவர் கொண்டாட்டங்களாக கொடுத்தார், நாயகனில் வரும், அந்தி மழை மேகம், தங்கமழை தூவும் பாடல்கூட அதில் ஒன்றுதான்.

கறுப்பு வெள்ளை படமான அன்னக்கிளியில் புல்லாக்குழல் குரல்கொண்ட எஸ் ஜானகியை, மச்சானை பார்த்தீங்களா என ரன்னிங் ரேஸ் வீராங்கனைபோல வேகவேகமா ஓடவிட்டார்,

சொந்தமில்லை பந்தமில்லை வாடுது ஒரு பறவை என பி.சுசிலாவுக்கு சோகத்தை குரலில் குழைத்துக்கொடுத்தார்.. அதே போல ஜாம்பவான் டிஎம்எஸ்சை, அழுத்தமான குரலில், அன்னக்கிளி உன்னைத்தேடுதே என அழவைத்து இசைப்பிரியர்களை உருகவைத்தார்.

முதல் படத்தில்தான் இவ்வளவு சாகசங்களையும் செய்தார் இளையராஜா. படம் பாடல்களுக்காக தாறுமாறாக ஒடி வெற்றிகொடியை நாட்டியது. இதில் கொடுமை என்னவென்றால், அன்னக்கிளி படத்திற்கு விமர்சனம் எழுதிய ஆனந்த விகடன் பத்திரிகை ,இளையராஜா என்பவர் இசையமைத்திருக்கிறார் என்ற விஷயத்தை பற்றி ஒரு வரிகூட எழுதவில்லை..

பாடல்களுக்காகவே ஒடிய ஒரு படத்திற்கு, இசையை பற்றி குறிப்பிடாமலேயே விமர்சனம் வைத்த ஒரே பத்திரிகை ஆனந்த விகடனாகத்தான் இருக்கும்.

அன்னக்கிளி தொடர்பான இன்னொரு முக்கியமான விஷயம்., முதல் படத்திற்கு முதன் முதலாய் ரெக்கார்டிங்கிற்கு அமரும்போதே பவர் கட்..

ஆனால் அபசகுனத்தையெல்லாம் பொருட்படுத்தாமல் தயாரிப்பாளர் பஞ்சு அருணாசலம் அவர்கள், இளையராஜாவை சேர்த்து பிடித்து நம்பிக்கை கொடுத்தார். அந்த நம்பிக்கையை அவரும் வீணாக்கவில்லை. தன்னை யார் என்று நிரூபித்தார் அப்போதைய மதுரை மாவட்டத்திலிருந்த பண்ணைபுரத்து பாமர மனிதர் இளையராஜா.

ஜி.ராமநாதன், எஸ்எம் சுப்பையா நாயுடு கேவி மகாதேவன், விஸ்வநாதன்-ராமமூர்த்தி போன்றோர் கோலேச்சிய இசை உலகில் தனியாக தனக்கென பாணியை கடைபிடித்தால்தான் சாதிக்க முடியும் என்பதை தெளிவாகவே புரிந்துகொண்டார்..

களத்தில் உள்ள எம்எஸ்வியை மீறி முன்னுக்கு வர வேண்டும் என, எழுபதுகளின் இறுதிகளில் போராடிய போது போட்ட பாடல்கள்,. அவற்றில் பறந்த மண்வாசனை, அப்பப்பா அத்தனையும் வியக்கத் தக்கவை..

அதனால்தான், இயக்குநர்கள் தேவராஜ்-மோகன் தொடர்ந்து வரிசையாக கொடுத்த வாய்ப்பை அவர் தவறவிட வேயில்லை

நான் பேசவந்தேன் ( பாலூட்டி வளர்த்த கிளி), ஒரு நாள் உன்னோடு ஒரு நாள் ( உறவாடும் நெஞ்சம்), கண்ணன் ஒரு கை குழந்தை (பத்ரகாளி) என மிரட்சியான ஹிட் பாடல்களை கொடுக்க முடிந்தது.

இளமை ஊஞ்சலாடுகிறது படத்தின் ஒரே நாள் உனை நான் நிலாவில் பார்த்தது..என்ன ஒரு மாஜிக்.. ஆயிரம் தடவைக்கு மேல் கேட்டிருந் தாலும். இன்றைக்கும் தினம் இரண்டு தடவையாவது…

சோளம் வெதைக்கையிலே…

ஆயிரம் மலர்களே மலருங்கள்,

நினைவோ ஒரு பறவை..விரிக்கும் அதன் சிறகை…

ஆகாய கங்கை பூந்தேன் மலர் சூடி….

நல்லவர்க்கெல்லாம் சாட்சிகள் ரெண்டு.

அந்தப்புரத்தில் ஒரு மகராணி…

தென்னை மரத்துல தென்றலடிக்குது (அவரின் முதல் டூயட்)

செந்தாழம் பூவில் வந்தாடும் தென்றல்..என பின்னிபெடலெடுத்தார்….

வெளிநாட்டில் படமாக்கப்பட்ட ப்ரியா படத்தில் இளையராஜா போட்ட ஐந்து பாடல்களும், அவர் இன்னொரு தளத்திற்கு தமிழ்சினிமா இசையை கொண்டுசெல்லப்போகிறார் என்பதை கோடிட்டு தெளிவாகவே காட்டின.

பாடலுக்கான இசையை தாண்டி பின்னணி இசையிலும் கலக்கினால் இன்னும் உச்சம் தொடலாம் என்பது 1980களின் துவக்கத்தில் இளையராஜாவுக்கு நன்றாகவே புரிந்துவிட்டது. அதனால்தான் அந்த ஏரியாவிலும் அதிகமாக கவனம் செலுத்த ஆரம்பித்தார்.

1980களில் தமிழ் சினிமா உலகை பொறுத்தவரை இளையராஜா பாடல்கள் மட்டுமே சூப்பர் ஸ்டார்.. நடிகர்கள் யார் என்பதெல்லாம்கூட இரண்டாம் கட்ட விஷயம்தான்.

ரஜினி, கமல், மோகன், பாக்கியராஜ், கார்த்தி விஜயகாந்த் பிரபு , சத்யராஜ், ராமராஜன் என அனைவருக்கும் இளையராஜா இசைதான் பெரிதும் உதவின.

பக்கா கமர்சியல் படமான கமலின் காக்கிச்சட்டையில் இளையராஜாவின் பின்னணி இசை பல இடங்களில் அதகளம் செய்யும்.. டைட்டிலியே தனி கச்சேரி செய்திருப்பார்.. பிணத்தை விமானத்தில் கடத்திக்கொண்டு வந்து விமான நிலையத்திலிருந்து காரில் ஏறுகிற வரை விறுவிறுப் பான காட்சிகளின், எடிட்டிங்கிற்கு பின்னணி இசை அவ்வளவு சவால் விட்டிருக்கும்.. படத்தின் போக்கில்தான் அந்த இசைக்கோர்வையின் வீரியம் புரியும்..

முதல் மரியாதை, நாயகன், தளபதி போன்ற படங்களை போட்டுவிட்டு பக்கத்து அறையில் படுத்துக்கொண்டு இசையை மட்டும் காதில் கேட்டால் அப்படியொரு அலாதியான சுகம் கிடைக்கும்.. படம் முழுக்க பின்னணி இசையை அருவியாக ஓடவிட்டிருப்பார்..

நாயகன் படத்தின் தென்பாண்டி சீமையிலே பாட்டை சொல்லத்தேவையில்லை. நான்கே விநாடிகள். டொண்ட டொண்ட டொண்ட டொய்ங் என விவேக் பாணியில் சொன்னால் போதும். பாடலின் துவக்கம் விளங்கிவிடும்.

திரையிசையில் தாம் நெம்பர் ஒன் என ஒரு நிலை உருவானபோது…80 களின் மத்தியில் தென்றலே என்னைத்தொடு. வைதேகி காத்திருந்தாள், ஆண்பாவம்..உதயகீதம். காக்கிச்சட்டை, புன்னகை மன்னன், மௌனராகம் என அவரின் இசை, அப்போது தொடர்ந்து தாக்கிய சுனாமிகளே

கோவைத்தம்பியின் மதர்லேண்ட் பிக்சர்ஸ்சில் மோகன் கதாநாயகனாக மைக் பிடித்துக்கொண்டு நின்றால் மட்டும் போதும். பாடல்களை போட்டு ஹிட்டாக்கி வெள்ளிக்காசுகளை மூட்டை மூட்டையாக கொட்டவைத்த வரலாறெல்லாம் வியப்பானவை..

டவுசர், மாடு, குடிசை வீடு காமாச்சி, மீனாச்சி என ஏதாவது இரண்டு மூன்று பெண் கேரக்டர்கள். ஹீரோவாக ராமராஜன்.. அப்புறம் ஒரே தேவை . இளையராஜாவின் இசை..எல்லாமே பாட்டுக்காக ஓடி வசூலை வாரி வாரி குவித்து கோடம்பாக்கத்தையே வியக்க வைத்ததையெல்லாம் விவரிக்க தனி புத்தகமே போடவேண்டும்..

நம்மைப் பொருத்தவரை அவரின் முதல் பத்தாண்டுகள் இன்றளவும் வியப்பாகவே உள்ளது..

ஒரே நாள் உனை நான் ( இளமை ஊஞ்சலாடுகிறது)

நானே நானா யாரோ..(அழகே உன்னை ஆராதிக்கிறேன்)

தென்னை மரத்துல தென்றல் அடிக்குது (லட்சுமி)

சின்னப்பொன்னுசேலை (மலையூர் மம்பட்டியான்)

பூமாலையே தோள் ( பகல் நிலவு)

ராஜா கைய வெச்சா (அபூர்வ சகோதர்கள்)

சுந்தரி கண்ணால் ஒரு சேதி ( தளபதி)

ஆனந்த தேன் காற்று..(மணிப்பூர் மாமியார் படம் வரவில்லை)

பூங்காற்று திரும்புமா ( முதல் மரியாதை)

இளையராஜாவின் இசைப்பயணத்தை நன்கு ஆராய்ச்சி செய்தால் அவருக்கும் ஒரு குறை உண்டு. ..

கேவிஎம், மெல்லிசை மன்னர்கள் பாடல்கள் காலத் தையும் விஞ்சி இன்றும் நிற்கின்றன.. இசையையும் தாண்டி அவற்றை தாண்டி சாகா வரம் தந்தது கண்ணதாசன், வாலி ஆகிய இருவரின் வைர வரிகள்..

போனால் போகட்டும் போடா,

சட்டி சுட்டதடா, கைவிட்டதடா

அச்சம் என்பது மடமையடா,

என்னதான் நடக்கும். நடக்கட்டுமே..

நான் ஆணையிட்டால் அது நடந்துவிட்டால்

சோதனை மேல் சோதனை போதுமடா சாமி,

யாரை நம்பி நான் பிறந்தேன்..காதல்,தத்துவம். வீரம், சோகம், நகைச்சுவை என அனைத்து ஏரியாக்களிலும் இவர்கள் வரிகள் ரவுண்ட் கட்டின..

ஆரம்பத்தில் கண்ணதாசன், வாலி, புலமைப்பித்தன், முத்துராமலிங்கம், நா,காமராசன், முத்துலிங்கம் போன்றோர் கலந்து கட்டி இளையராஜாவுக்காக அருமையான பாடல்களை கொடுத்தார்கள்..

ஆஸ்தான கவிஞராக இளையராஜா யாரையும் வைத்திருக்கவில்லை.. ஆரம்பத்தில் வைரமுத்துவிற்கு அந்த இடத்தை கொடுத்தார்..இருப்பினும் வார்த்தைகளால் சாகா வரம்பெற்ற பலவிதமாய் எளிமையான பாடல்கள் பிறந்ததா என்றால், இல்லை என்றே தோன்றுகிறது…

பாடலுக்கு இனிமை,, வியக்கவைக்கும் பின்னணி இசை என்று அசத்திய இளையராஜாவுக்கு, கண்ணதாசன், வாலி வகையறா போன்ற உண்மையான வைரவரிகள் பின்பலம் நிரந்தரமாக அமைந்திருந்தால்…..அது இன்னும் சிறப்பாக அமைந்திருக்கும்

1980 களின் துவக்கத்தில் பூஜை போடப்பட்ட மணிப்பூர் மாமியார் படத்தில் ஒரு பாடல்..

ரசிகனே என் அருகில் வா என அவரே பாடி கலக்கிய பாடல் அது.. அதில் கடைசியாக இப்படி வரும்..

”தெரிந்ததை நான் கொடுக்கிறேன்

தெம்மாங்கு ராகங்கள் சேர்த்து

இதயங்கள் சில எதிர்க்கலாம்

எதிர்ப்பவர் அதை ரசிக்கலாம்.

நான் காணும் உள்ளங்கள்

நல் வாழ்த்து சொல்லுங்கள்

நாளும் நாளும் இன்பம் இன்பம்.”

LEAVE A REPLY

Please enter your comment!
Please enter your name here