உலக புலிகள் தினம் ஜூன் 29 .

0
166

புலிகள் பாதுகாப்பு குறித்த விழிப்புணர்வை ஏற்படுத்தும் பொருட்டு ஆண்டு தோறும் ஜூன் 29 ஆம் தேதி சர்வதேச புலிகள் தினம் கடைபிடிக்கப்படுகிறது. காட்டின் அரசன் சிங்கம் என அறியப்படும் நிலையில், அவற்றை விட வேட்டையாடுவதில் புலிகளே சிறந்தவை புள்ளி விவரங்கள் தெரிவிக்கின்றன. பல்வேறு வகைகளில் புலிகள் சிறப்பம்சம் கொண்டவையாக உள்ளன. கூட்டமாக இருப்பதை தவிர்க்கும் புலிகள் பெரும்பாலும், தனிமையிலேயே வலம் வரும்.

சிங்கங்களை போல அல்லாமல் இறுதிவரை போராடும் திறன் கொண்ட புலிகள் வேட்டையாடிய உணவை முதலில் தனது குட்டிகளுக்கு கொடுத்த பிறகே தான் உண்ணும். பொதுவாக மனிதர்களை இரையாக பார்க்காத புலி தான் துன்புறுத்தப்படும் போது மட்டுமே தாக்குகிறது.

மற்ற வேட்டை விலங்குகளை காட்டிலும் புலிகள் அதிக நினைவு திறன் கொண்டவையாக உள்ளதுடன் இரையின் சத்தம் மற்றும் நடமாட்டத்தை எளிதில் உறுதி செய்யும் திறன் கொண்டது.

இந்தியாவின் தேசிய விலங்கான புலிகளின் எண்ணிக்கையை கணக்கெடுக்கும் பணி 1972 ஆம் ஆண்டு முதன் முதலாக நடைபெற்றது. எதிர்பார்க்கப்பட்ட எண்ணிக்கையை விட குறைந்த அளவே புலிகள் உள்ளது தெரிய வந்ததால், 1973 ஆம் ஆண்டு புலிகள் பாதுகாப்பு திட்டத்தை அரசு உருவாக்கியது. இதன் மூலம் புலிகளின் எண்ணிக்கையை அதிகரிக்க முயற்சி எடுத்தது. சர்வதேச சந்தையில் புலிகளின் பாகங்களுக்கு பெரும் மதிப்பு இருப்பதால் அவற்றை பலர் வேட்டையாடுகின்றனர். இதனால், புலிகளை காக்கும் பொருட்டு வன சட்டங்கள் கடுமையாக்கப்பட்டன. இதன் பிறகே புலிகளின் எண்ணிகை சற்று அதிகரிக்க தொடங்கியது. உலகில் உள்ள மொத்த புலிகளில் 70 சதவீத புலிகள் இந்தியாவில் உள்ளன. 2014 ஆம் ஆண்டின் கணக்குப்படி உலகில் உள்ள 3, 890 புலிகளில் 2, 226 புலிகள் இந்தியாவில் இருப்பதாக புள்ளி விவரங்கள் தெரிவிக்கின்றன. சர்வதேச புலிகள் தினத்தை ஒட்டி பிரதமர் மோடி வெளியிட்டுள்ள அறிவிப்பில், இந்தியாவில் 2, 967 புலிகள் உள்ளதாக தெரிவிக்கப்பட்டுள்ளது. இதன் மூலம் இந்தியாவில் புலிகள் எண்ணிக்கை 33 சதவீதம் அதிகரித்துள்ளது. காட்டுயிர்களின் உணவு சங்கிலியில் பெரும் பங்கு வகிக்கும் புலிகள் வனங்களின் வளர்ச்சிக்கும் பெரும் பங்காற்றி வருகின்றன. இதனால் புலிகளை பாதுகாக்க அரசு மட்டுமல்லாது பொதுமக்களும் முன் வரவேண்டும் என்பதே சமூக ஆர்வலர்கள் முன் வைக்கும் கருத்தாக உள்ளது.

இந்தியாவில் புலிகளின் நிலை

இந்தியாவில் அதிகமான புலிகள் வாழும் மாநிலமாக மத்தியபிரதேசம் உள்ளது. இங்கு 526 புலிகள் உள்ளதாக தெரிவிக்கப்பட்டுள்ளது. 2014ல் மத்திய பிரதேசத்தில் 308 ஆக இருந்த புலிகளின் எண்ணிக்கை தற்போது 526 ஆக உயர்ந்துள்ளது. இதனை தொடர்ந்து அதிக புலிகள் வாழும் இரண்டாவது மாநிலமாக கர்நாடகா உள்ளது. இங்கு 524 புலிகள் இருப்பதாக தெரிவிக்கப்பட்டுள்ளது.

தமிழகத்தில் புலிகள்

தமிழகத்தில் 264 புலிகள் உள்ளதாக அறிவிக்கப்பட்டுள்ளது. புலிகள் எண்ணிக்கை அதிகமாக உள்ள மாநிலங்களில் ஐந்தாவது இடத்தில் தமிழகம் உள்ளது.

தமிழகத்தில் தொடர்ந்து புலிகளின் எண்ணிக்கை அதிகரித்து வருகின்றது. 2006ம் ஆண்டில் தமிழகத்தில் 76 ஆக இருந்த புலிகளின் எண்ணிக்கை, 2010 ல் 163 ஆகவும், 2014ல் 229 ஆகவும் உயர்ந்தது. தற்போது தமிழகத்தில் 264 ஆக புலிகளின் எண்ணிக்கை உயர்ந்துள்ளது. தமிழகத்தில் களக்காடு முண்டந்துறை புலிகள் காப்பகம், ஆனைமலை புலிகள் காப்பகம், முதுமலை புலிகள் காப்பகம் , சத்தியமங்கலம் புலிகள் காப்பகம் என நான்கு புலிகள் காப்பகங்கள் உள்ளன.

இதில் சத்தியமங்கலம் புலிகள் காப்பகம் சிறப்பாக மேலாண்மை செய்யப்பட்ட புலிகள் காப்பகமாக தேர்ந்தெடுக்கப்பட்டுள்ளது. இன்று நடைபெற்ற தேசிய புலிகள் பாதுகாப்பு ஆணையத்தின் விழாவில் பிரதமர் நரேந்திர மோதி, சத்தியமங்கலம் புலிகள் காப்பகத்திற்கான விருதினை , சத்தியமங்கலம் புலிகள் காப்பகத்தின் தற்போதைய கள இயக்குனர் நாகநாதனிடம் அளித்தார்.

தமிழகத்தின் நான்காவது புலிகள் காப்பகமாக, 2013ம் ஆண்டில் சத்தியமங்கலம் வனப்பகுதி அறிவிக்கப்பட்டது. தற்போது தமிழகத்தில் அதிக பரப்பளவுள்ள புலிகள் காப்பகம் இதுதான். வறண்ட இலையுதிர் காடுகள், முட் புதர் காடுகள் , மலைப்பகுதி, ஆற்றோர படுகை என வேறுபட்ட அடுக்குகளில் அமைந்துள்ள இந்த சத்திய மங்கலம் வனப்பகுதி புலிகள் வாழ ஏதுவான பகுதியாக இருப்பதால் இங்கு புலிகளின் எண்ணிக்கை சீராக உயர்ந்து வருகிறது.

உயரும் புலிகளின் எண்ணிக்கை ஏன் நல்லது?

புலிகள் வளமான காட்டின் குறியீடு. உணவு சங்கிலியின் உச்சத்தில் இருக்கும் புலி இருந்தால், அந்த வனப்பகுதியில் மற்ற உயிர்கள் அனைத்தும் வளமாக இருக்கும் என நம்பப்படுகிறது.

20ம் நூற்றாண்டின் தொடக்கத்தில் இந்தியாவில் மட்டும் 40 ஆயிரம் புலிகள் வாழ்ந்ததாக கூறப்படுகிறது. ஆனால், வேட்டை முதலிய பல காரணங்களாலும் தொடர்ந்து உலகெங்கும் புலிகளின் எண்ணிக்கை குறையத் தொடங்கியது. 1972ல் இந்தியாவில் நடந்த புலிகள் கணக்கெடுப்பில் 1872 புலிகள் தான் இந்தியாவில் எஞ்சியுள்ளதாக தெரியவந்ததைத் தொடர்ந்து இந்தியாவில் தொடர்ந்து புலிகளை பாதுகாப்பதற்காக பல திட்டங்கள் முன்னெடுக்க பட்டன. 1973ம் ஆண்டு அன்றைய இந்திய பிரதமர் இந்திராகாந்தி புலிகள் திட்டம் (புராஜெக்ட் டைகர்) என்ற முன்னெடுப்பை தொடங்கினார்.

இதன்கீழ் புலிகள் வாழும் பகுதிகளை புலிகள் காப்பகமாக அறிவித்து சிறப்பு நிதி ஒதுக்கி அப்பகுதிகளின் பாதுகாப்பை பலப்படுத்துவது, புலி வேட்டையினை தடுப்பது ஆகிய நடவடிக்கைகள் எடுக்கப்பட்டன. இந்தியாவில் புலிகளின் எண்ணிக்கை மெல்ல மெல்ல உயரத் தொடங்கியது.

20ம் நூற்றாண்டின் தொடக்கத்தில் உலகில் ஒரு லட்சத்திற்கும் அதிகமாக இருந்த புலிகளின் எண்ணிக்கை ஆயிரங்களை நோக்கி அழிவுப்பாதையில் சென்றது. புலிகள் பாதுகாப்பிற்காக உலகெங்கும் எடுக்கப்பட்ட தொடர் முயற்சிகளால் புலிகளின் எண்ணிக்கை உயர்ந்து வருகிறது. உலகில் காடுகளில் அதிக அளவு புலிகள் வாழும் நாடான இந்தியாவில் உயரும் புலிகளின் எண்ணிக்கை நம்பிக்கை அளிப்பதாக பலரும் கருதுகின்றனர்.

உலகப் புலிகள் எண்ணிக்கையில் இந்தியாவில் மட்டும் 70%

உலகப் புலிகள் எண்ணிக்கையில், தற்போது இந்தியாவில் சுமார் 70 சதவீதம் உள்ளது.

புலிகள் வசிக்கும் நாடுகளின் தலைவர்கள், ரஷ்யாவில் உள்ள செயின்ட் பீட்டர்ஸ்பர்க்கில் 2010-ல் ஒன்று கூடி, 2022 ஆம் ஆண்டிற்குள் உலகில் உள்ள புலிகளின் எண்ணிக்கையை இரண்டு மடங்காக பெருக்குவது என்ற பிரகடனத்தில் கையெழுத்திட்டனர்.

இது புலிகள் பாதுகாப்புக்கான செயின்ட் பீட்டர்ஸ்பர்க் பிரகடனம் என்று அழைக்கப்படுகிறது. அதே கூட்டத்தில், ஆண்டுதோறும் ஜூலை 29-ந் தேதியை உலகப் புலிகள் தினமாகக் கொண்டாடுவது என்றும் தீர்மானிக்கப்பட்டது.

மத்திய அரசு, நமது நாட்டில் உள்ள புலிகள் எண்ணிக்கையை கேமரா மூலம் கண்காணித்து கணக்கெடுக்கிறது. உலகிலேயே மிகப் பெரிய அளவில் கேமரா மூலம் புலிகளைக் கண்காணித்து கணக்கெடுப்பதில் இந்தியா கின்னஸ் உலக சாதனையைப் படைத்துள்ளது. மத்திய சுற்றுச்சூழல் அமைச்சர் பிரகாஷ் ஜவடேகர், இந்த சாதனையை நாட்டு மக்களுக்கு அர்ப்பணித்துள்ளார்.

இந்த நிகழ்ச்சி, இன்று புதுடெல்லியில் உள்ள தேசிய ஊடக மையத்தில் நடைபெற்றது. நாடுமுழுவதுமிருந்து சுமார் 500 பங்கேற்பாளர்கள் பங்கேற்றனர். இந்த நிகழ்வில் மத்திய சுற்றுச்சூழல் அமைச்சர் பிரகாஷ் ஜவடேகர் கலந்து கொண்டு கூறியதாவது:

உலகப் புலிகள் எண்ணிக்கையில், தற்போது இந்தியாவில் சுமார் 70 சதவீதம் உள்ளது. இது நமது நாட்டிற்கு பெருமை அளிக்கிறது. இந்தியாவில் மொத்தம் 30 ஆயிரம் யானைகள் உள்ளன. 3 ஆயிரம் காண்டாமிருகங்கள் உள்ளன. 500க்கும் அதிகமான சிங்கங்கள் உள்ளன.
இவ்வாறு அவர் கூறினார்.

மத்திய சுற்றுச்சூழல் அமைச்சர் புதிய இணையதளம் ஒன்றை தொடங்கி வைத்தார். தேசிய புலிகள் பாதுகாப்பு ஆணையகத்தின் பத்திரிகை ஒன்றையும் வெளியிட்டார்.

LEAVE A REPLY

Please enter your comment!
Please enter your name here